Filippo II re di Castiglia e di Aragona ecc. approva i capitoli di Corte discussi e deliberati nel Parlamento celebrato in Sardegna sotto la presidenza del vicerè Lorenzo Fernandez de Heredia.
(1560. – 8 maggio).
Dall’antico Archivio del Regio Patrimonio in Sardegna, Cod. sudd., fol. 120 e seg.
Nos Philippus Dei gratia Rex Castellae, Aragonum, Legionis, utriusque Siciliae, Hierusalem, Portugaliae, Hungariae, Dalmatiae, Croatiae, Navarrae, Granatae, Toleti, Valentiae, Galitiae, Majoricarum, Hispalis, Sardiniae, Cordubae, Corsicae, Murciae, Giennis, Algarbij, Algezirae, Gibraltaris, Insularum Canariae, nec non Indiarum Orientalium et Occidentalium, Insularum ac Terrae firmae maris Oceani, Arcidu Austriae, Dux Burgundiae, Brabantiae, Mediolani, Athenarum, et Neopatriae, Comes Abspurgii, Flandriae, et Tirolis, Barchinonae, Rossilionis, et Ceritaniae, Marchio Oristani, et Comes Gociani. – Diebus retro elapsis pro parte trium Stamentorum Regni nostri Sardiniae fuerunt oblata, et humiliter praesentata coram Serenissima Infanta Joanna Principe Portugaliae Sorore charissima, ac Locumtenenti generali nostro in Regnis Hispaniarum Capitula per ipsa tractata in Parlamento per spectabilem Don Laurentium Fernandez de Heredia Locumtenentem generalem nostrum, ac vice et nomine Nostri, regnicolis ejusdem Regni indito, et celebrato, una cum responsionibus in calce cujuslibet Capituli per dictum Locumtenentem generalem factis, quae quidem Capitula per celsitudinem decretata extitere, prout in eis continetur. Nunc vero per dilectum nostrum Assorem Sapata domicellum, et Alcaidum nostrae civitatis et Castri Calaris, Sindicum Stamenti militaris dicti Regni Sardiniae ad nos destinatum, Majestati nostrae fuit humiliter expositum, et deductum, quod dum Capitula ipsa per dictam Serenissimam Sororem nostram decretarentur, nullus pro parte Stamentorum dicti Regni extitit, qui de rebus servitio nostro, et utilitati dicti Regni incumbentibus informationem daret, et proinde decretationes in praedictis Capitulis factas per suam celsitudinem reformatione egere, humiliter supplicando, ut ipsam in aliquibus ex dictis Capitulis, et decretationibus fieri mandare dignaremur. Nos autem volentes utilititati, et conservationi Stamentorum praedictorum, ac Regni nostri praefati, prout aequum est, consulere, Capitula ipsa per dictum Alcaydum coram Nobis oblata recognosci fecimus in nostro Sacro Supremo Regio Consilio, ipsisque, post decretationes dictae Serenissimae Principis Sororis nostrae, responderi et provideri mandamus, prout in calce uniuscujusque Capituli continetur, quorum quidem petitionis Capitulorum, et suarum decretationum series sequitur inde sub hiis verbis (1)….
Quae quidem Capitula praeinserta, juxta responsiones et decretationes in iisdem appositas laudantes et approbantes illa, et in eis contenta, et alia expressa a praenominato Stamento militari, de nostra certa scientia, deliberate et consulto, dicti nostri Sacri Supremi Consilii deliberatione praeeunte, concedimus, consentimus, et deliberate elargimur, nostraeque hujusmodi concessionis, consensus, et elargitionis munimine, seu praesidio roboramus, et validamus, auctoritatemque nostram Regiam interponimus pariter, et decretum, Serenissimo propterea Carolo Principi Asturiarum, et Gerundae, Duci Calabriae, filio primogenito nostro, ac post felices et longaevos dies nostros in omnibus regnis et dominiis nostris, Deo propitio, immediato haeredi, et legittmo successori intentum aperientes nostrum, sub paternae benedictionis obtentu dicimus; Spectabili vero, Nobilibus, Magnificis, et dilectis Consiliariis, Locumtenenti et Capitaneo generali in praefato Nostro Sardiniae Regno, Regenti Cancellariam, Judici Regiae Curiae, et Advocato fiscali, Gubernatoribus quoque seu Reformatoribus in Capitibus Calaris, Gallurae, et Lugodorii, Regio Procuratori, ac Ministro Rationali, Algueziriis, Potestatibus, Virgariis, et Portariis, caeterisque aliis Officialibus, et subditis nostris in dicto Sardiniae Regno coustitutis et constituendis praecipimus, et jubemus, ad incursum nostrae indignationis et irae, poenaeque florenorum auri Aragonum decem mille nostri inferendorum aerariis, ut Capitula praeinserta, et unumquodque eorum, juxta decretationem et responsionem in fine cujuslibet eorum contentarum seriem, et tenorem, teneant firmiter, et observent, tenerique et inviolabiliter observari per quos deceat, faciant, cauti secus agere, fierique permittere aliqua ratione, seu causa, si dictus Serenissimus Princeps nobis morem gerere, caeterique vero Officiales et subditi nostri, praeter irae et indignationis nostrae incursum, poenam praeappositam cupiunt evitare. In cujus rei testimonium praesentem fieri, et in processu dicti Parlamenti inseri, sigilloque nostro Regio majori pendente communiri jussimus. Datum in nostra civitate Tolleti, die octavo mensis maij, anno a Nativitate Domini millesimo quingentesimo sexagesimo, Regnorum vero nostrorum, videlicet Hispaniae, et ulterioris Siciliae quinto, citerioris vero Siciliae et aliorum septimo.
Yo el Rey.
Vid. Camacius Regenti Vid. Ghignita Regenti
Vid. Joan Ximenez pro generali Thesaurarius Vid. Luna Regenti
Vid. Loris Regenti
Vid. Clemens pro Conservatore generali.
In Sardiniae fol. 27
Dominus Rex mandavit mihi Michaeli Clementi, visa per Camacium
Regenti Cancellarius etc. etc.
(1) Seguono nel Codice i Capitoli di corte presentati alla sanzione regia. Erano dieciotto quelli votati dai tre Bracci del Parlamento, e quaranta gli altri votati dallo Stamento militare. Dei primi ne furono accordati soli dodici; e dei secondi soli trentuno.