L’imperatore Carlo V, e la regina Giovanna sua madre approvano i capitoli di Corte, ossia le domande discusse e deliberate nel Parlamento celebrato in Sardegna sotto la presidenza del vicerè Antonio di Cardona.
(1545. 29 aprile).
Dal suddetto Archivio dell’antico Patrimonio Regio di Sardegna, Cod. cart., fol. 90 e seg.
Nos Carolus divina favente clementia Romanorum Imperator semper Augustus, Rex Germaniae, et Joanna mater ejus, et idem Carolus Dei gratia Reges Castellae, Aragonum, utriusque Siciliae, Hierusalem, Ungariae, Dalmatiae, Croatiae, Legionis, Navarrae, Granatae, Toleti, Valentiae, Galitiae, Majoricarum, Hispalis, Sardiniae, Cordubae, Corsicae, Murciae, Giennis, Algarbi, Algezirae, Gibraltaris, Insularum Canariae, nec non Insularum Indarum, et Terrae firmae, maris Oceani, Archiduces Austriae, Duces Burgundiae et Brabantiae etc., Comites Barchinonae, Flandriae et Tirolis etc., Domini Viscayae et Molinae etc., Duces Athenarum et Neopatriae, Comites Rossilionis, et Ceritaniae, Marchiones Oristani, et Gociani. – Optimi, gratissimique principes fidelium subditorum petitiones, praesertim reipublicae utilitatem, et universale commodum concernentes, liberaliter exaudire, eisque annuere laeto animo, grataque et prompta voluntate passim consueverunt: quippe qui, dum erga sibi fideles, et devotos regiis largitionibus, gratiis, et favoribus benevolos, memores, munificosque se praebent, in illorum animos fidelitatem ipsam, ac devotionem adaugent, eosque ad gratiora obsequia praestanda invitant, et alliciunt, caeterosque simili exemplo ductos ad eamdem fidelitatem servandam, majoraque servitia exhibenda provocant, et inducunt. Attendentes igitur ad maximam, integramque devotionem nostri praefati Regni Sardiniae, suorumque regnicolarum, et naturalium notabilia, praeclaraque servitia, et obsequia, quae jugiter multis modis Regibus Aragoniae, praedecessoribus nostris, et nobis successive in quacumque tempestate, et fortuna praestiterunt, idque in dies continuare non desistunt, ac novis et majoribus collationibus promptum, et benevolum animum, quem erga servitium nostrum gerunt, totis viribus significare, merito astringimur, ut quidquid pro universali, et comuni reipublicae beneficio supplicant liberaliter eis concedamus. Cum itaque nobilis, magnificus, ac admodum dilectus alumnus noster Don Blasius de Alagon, Ambasciator ad nos destinatus, nobis dederit, et porrexerit quaedam capitula in Parlamento novissime in ipso et eodem Regno celebrato pro comuni beneficio et universali utilitate Regni annotata, nobisque humiliter supplicaverit, ut in eis contenta benigne concedere dignaremur; cujus quidem assertioni vehementi multa etiam nos hactenus latentia de summa erga nos dicti Regni fide, integraque affectione, et servitute laeta mente suscepimus. Quamobrem capitulis ipsis per nos visis, recognitis, et in nostro Sacro Supremo Consilio discussis, maturaque praehabita deliberatione subscripta, elargiri liberaliterque, et gratiosa concedere, et respondere dignati sumus, juxta decretationes in calce singulorum capitulorum inferius insertorum subsequenter appositas. Quorum, quarumque tenor, et serie, de verbo ad verbum, sub tali procedit (1)…
Qua propter tenore praesentium, de nostra certa scientia regiaque auctoritate, et consulto, praefata capitula et unumquodque eorum, prout in ipsorum calce est affixum, concedimus, decernimus, pariterque laudamus, et apporbamus, laudarique, et approbari volumus, et jubemus. Illustrissimo propterea Philippo Principi Asturiarum, et Gerundae etc. filio primogenito, et nepoti nostro charissimo, ac post felices, et longaevos dies nostros in omnibus regnis et dominiis nostris, immediate haeredi, et legitimo successori, nostrum aperientes intentum, sub paternae, avitaeque benedictionis obtentu dicimus, eumque rogamus; spectabili vero Locumtenenti, et Capitaneo generali nostro, seu Praesidenti in dicto nostro Sardiniae Regno; magnificis insuper, et dilectis, et fidelibus Consiliariis nostris regenti nostram cancellariam in eodem Regno, Gubernatoribusque in Capitibus Calaris, Gallurae, Logudorii, Magistro rationali, regio Procuratori, et Receptori regii reservati, Advocato quoque, et Procuratoribus fiscalibus, Vicariis, Subvicariis, Potestatibus, Capitaneis, Justitiis, Juratis, Consiliis, et Universitatibus totius praefati Regni Sardiniae, ac universis, et singulis Officialibus, personis, et subditis Nostris in dicto Regno constitutis, et constituendis, quocumque nomine, titulo, auctoritate, officio, aut dignitate fungentibus, praesentibus, et futuris, ad quos spectet, dicimus, et districte praecipiendo mandamus, ad incursum nostrae indignationis, et irae, poenaeque florenorum auri aragonum decem mille nostris inferendorum aerariis, quatenus dicta capitula teneant firmiter, et observent, tenerique, et observari faciant inviolabiliter per quoscumque. In cujus rei testimonium praesentem fieri jussimus nostro sigillo comuni appendenti munitum. Datum in oppido Auturpiae die vigesima nona mensis aprilis, anno a Nativitate Domini millesimo quingentesimo quadragesimo quinto, imperii nostri anno vigesimo septimo, regnorum autem nostrorum, videlicet Reginae Castellae, Legionis, Granatae quadragesimo, Navarrae trigesimo primo, Aragonum vero, utriusque Siciliae, Hierusalem, et aliorum trigesimo, Regis vero omnium trigesimo.
Yo el Rey.
V. Figueroa Regenti V. Lud. Sanchez Reg.
V. Vargas pro generali Thesaurarius V. Lobera pro Conservatore generali
Caesarae et Catholicae Majestates mandarunt mihi Bartholomeo de Lobera, visa pro Figueroa, Regenti Thesaurarius, Conservatore generali etc.
(1) Seguono nel Codice, per inserzione, i capitoli presentati all’approvazione sovrana dal deputato del Parlamento. Sono ottanta, ma quattordici dei medesimi non furono approvati.