Lettere dell’Imperatore Carlo V e della Regina Giovanna al Vicerè di Sardegna, con le quali si ordina che siano osservati, rispettati ed eseguiti i privilegi e le immunità spettanti ai cittadini di Sassari.
(1529. – 27 luglio).
Dagli antichi Archivi Reali di Barcellona, vol. Itiner. Sigill. Comun. VIII. fol. 372 e seg.
Carolus Divina favente clementia G. Romanorum Imperator semper Augustus, Rex Germaniae, et Joanna ejus Mater, et idem Carolus ejus filius Dei gratia reges Castellae, Aragonum, Legionis, utriusque Siciliae, Hjerusalem, Hungariae, Dalmaciae, Croatiae, Navarrae, Granatae, Toleti, Valentiae, Gallitiae, Maioricarum, Hispalis, Sardiniae, Cordubae, Corsicae, Murciae, Guiennis, Algarbis, Algesirae, Gibraltaris, Insularum Canariae, et Insularum Indiarum et Terraefirmae Maris Oceani, Archiduces Austriae, Duces Burgundiae, et Brabantiae, Comites Barchinonae, Flandriae, et Tiroli, Domini Biscayae et Molinae, Duces Athenarum, et Neopatriae, Comites Rosilionis, et Caeritaniae, Marchionesque Oristanei et Goceani.
Illustribus, Spectabilibus, Nobilibus, Magnificis Consiliariis dilectis et fidelibus nostris quibuscumque, Viceregibus, Locumtenentibus et Capitaneis Generalibus nostris, Vicecancellariis, regentibus nostram Cancellariam, Magistris, et Justiciariis, regenti officium, gerentibus vices nostri Generalis Gubernatoris, Justitiis, Vicariis, Bajulis, Locumtenentibus, caeterisque demum universis et singulis oficialibus nostris, majoribus et minoribus, jurisdictionem qualemcumque in omnibus Regnis et ditione nostre Coronae Aragonum constitutis et constituendis, ad quem, seu ad quos pervenerit, aut fuerint quomodolibet praesentatae, aut de subscriptis requisiti fuerint, dictorumque oficialium locumtenentibus, et cuilibet eorum, salutem et dilectionem.
Dudum per nobilem et dilectum nostrum Don Galzerandum Cano çedrelles legum doctorem Sindicum per nostram Civitatem Saceris ad Nos destinatum Majestati nostrae humiliter deductum fuit, quod habitatores et cives dictae Civitatis a tanto tempore citra, quod non est memoria hominum in contrarium, virtute Regiorum privilegiorum sunt immunes in omnibus Regnis nostris a quibuscumque juribus, vectigalibus, et servitiis Regiis, quemadmodum in dictis privilegiis ad quae relatio habentur, latius asseritur contineri; de qua immunitate jamdiu extiterunt, et in praesentiarum existunt in possessionem, in qua, uti asseritur, per aliquos vexantur, et molestantur in non modico praejudicio illorum, detrimentumque dictorum suorum privilegiorum, timentes et jam magis in dies per alios in illa vexari, et molestari.
Nobis propterea suplicare fecerunt, ut cum per jura tam canonica quam civilia, et alias cautum existat neminem sua possessione privari debere, aut in ea perturbari, absque juris cognitione; dictos Cives praesentes, pariterque futuros in ea videlicet possessione qua fuerunt, et in praesentiarum existunt utendi, dictaque immunitate conservari, et manuteneri ex nostra solita clementia mandaremus. Qua suplicatione per Nos benigne exaudita, volentes dispositionibus dictorum jurium reddere nos conformes, tenore praesentium, nostra ex certa scientia, deliberate et consulte, ac Regia Auctoritate vobis et unicuique vestrum, ad quem spectet, dicimus et districte praecipiendo mandamus, poena bis mille florenorum auri Aragonum adiecta, quod dictos habitatores ac cives dictae Civitatis Saceris praesentes pariterque futuros in possessione utendi dictarum immunitatum, in ea videlicet, in qua actenus fuerunt, et de praesenti existunt ac reperiuntur, manuteneatis, et defendatis contra cunctos, nec permittatis eos in illa impediri aut perturbari, nec ab ea privari et spoliari per aliquos donec causa cognita per Nos, aut alium iudicem, ad quem spectaverit, aliter fuerit provisum, contrarium nullatenus tentaturi ratione aliqua, seu causa, pro quanto gracia nostra vobis chara est, et praeter indignationis nostrae incursum poenam praedictam, cui contravencionis casu prompta et rigida non deerit executio, evitare cupitis, sic omni justitia suadente providendum duximus, et per vos omnino complendum, dubio, dificultate, contraditione consulta, et aliis impedimentis cessantibus quibuscumque. Datum in Civitate nostra Barchinonae die 27 mensis Julij, anno a Nativitate Domini 1529.
Yo el Rey.
V.t Sanches Generalis Thesaurarium
V.t de Ferrera etc.
V.t de Bonini etc.
V.t de Romes etc.
In Itiner sigilli Comunis 8 fol. 372.