Ordinazione Regia di D. Pietro IV di Aragona, con la quale si comanda al Governatore, ed agli altri uffiziali Regii di Sardegna di far restituire al comune di Pisa le somme, che Alfonso di Ledrera avea estorto dagli abitanti di una villa, che lo stesso comune possedeva nell’isola a titolo di feudo, asserendosene creditore, senza darne alcuna prova.

(1353, 14 febbraio).

Dall’I. R. Archivio delle Riformagioni di Firenze, Classe e Distinz. sudd.

Petrus Dei gratia Rex Aragone Valentie, Maioricarum Sardinee et Corsice Comesque Barchinone Rossilionis et Ceritanee dilectis et fidelibus gubernatori Sardinee et aliis offitialibus nostris tam eiusdem ynsule quam aliorum regnorum et terrarum nostrarum presentibus et futuris vel eorum loca tenentibus ad quos presentes pervenerint salutem et dilectionem. Meminimus vobis dudum scripsisse per binas nostras licteras in hunc modum. Petrus dei gratia Rex Aragonae etc, dilectis et fidelibus regenti officium gubernationis Sardinee et aliis officialibus nostris tam eiusdem ynsule quam aliorum regnorum et terrarum nostrarum presentibus et futuris vel eorum loca tenentibus ad quos presentes pervenerint salutem etc. Nuper vobis scripsisse seu subscripta mandata direxisse recolimus in hiis verbis. Petrus Dei gratia Rex Aragone etc. dilectis et fidelibus regenti officium gubernationis Sardinee et aliis offitialibus nostris tam eiusdem ynsule quam aliorum regnorum et terrarum nostrarum presentibus et futuris vel eorum loca tenentibus ad quos presentes pervenerint salutem etc. Petictionis nobis reverenter exhibite per nobilem et dilectum nostrum Iacobum de Herisiis ambaxiatorem comunis pisarum series continebat quod olim Arnaldus de Ledrera qui in dicta insula morabatur asserens homines ville de Lectu que est ipsius comunis teneri sibi dare et solvere quandam pecunie quantitatem fecit eosdem homines ei redimi in sexaginta libras alfonsinorum minutorum licet ut fertur nullum instrumentum debitorium de predictis obstenderet vel haberet aliquam iustam causam, quam quidem quantitatem Iohannes de Turchio tunc vicarius sive rector villarum et locorum que prefatum comune habet in dicta ynsula ad hoc ut dictus Arnaldus non depredaret villam predictam prout comminatus fuerat fecit integre sibi solvi et nichilominus dictus Arnaldus veniens ad duas villas comunis predicti de curattaria Gippi, que ante fuerant sue earum hominibus imposuit datium, sive paytam pecunie, quam contra voluntatem ipsorum et vicarii predicti una cum expensis plurimis ab eis habuit ut dicitur et recepit; verum cum prelibatus ambaxiator asserat premissa in dicti comunis dampnum preiudicium et dispendium existere attemptata idcirco ad ipsius instantiam et supplicactionem humilem vobis dicimus et precipiendo districte mandamus, quatenus si est ita quilibet vestrum in districtu suo satisfaciatis et satisfieri faciatis dicto comuni vel eius procuratori de bonis que fuerunt Arnaldi predicti in omni eo quod repereritis eundem in dictis villis cepisse et indebite occupasse procedendo super hiis breviter et summarie et de plano et sine lite si et prout iustitia suadebit. Datum Barchinone quarto idus decembris anno Domini millesimo trecentesimo quadragesimo septimo. Nunc autem ante nostre magestatis presentiam constituti nobilis et dilectus consiliarius noster Iohannes de Herisiis decretorum doctor et Francischus Merolla ambaxiatores honorabilis comunis pisarum ad nos ex subscriptis causis et aliis destinati humili supplicatione mostraverunt quod licet vobis vel aliquibus ex vobis preinserta mandata nostra fuerint presentata fueritisque cum instantia requisiti ut ea exequeremini cum effectu, vos tamen aut aliqui vestrum hoc facere contemptabiliter distulistis pariter et differtis, de quo si ita est non modicum admirantes vobis et vestrum singulis sub incursu ire et indignactionis nostre precipimus et mandamus quatenus omnia et singula in preinserta lictera nostra contenta iuxta sui originalis seriem pleniorem exequamini et effectualiter impleatis et contra eam in aliquo venire non temptetis, vel per alios permictatis quomodolibet attemptari habendo vos super hiis taliter quod dictum comune aut districtuales ipsius ex hac causa de vobis iuste conquerendi materiam non assumant alioquin pro culpa si quam commictetis in premissis vos in personis et bonis acriter puniremus. Datum Valentie kalendas decembris anno Domini millesimo trecentesimo quadragesimo nono. Sane cum nunc per nobiles et dilectos nostros Iohannem de Hericiis consiliarium nostrum predictum et Iohannem Buzaccharini militem nuntios sive ambaxiatores per dictum comune pro hiis et aliis factis et negotiis ad nostram presentiam noviter destinatos coram nobis propositum fuit conquerendo quod vos mandata nostra superinserta improvide spernendo quamquam vos vel vestrum aliqui fueritis pluries requisiti ut ipsa exequeremini et ad effectum iustitie duceretis id facere minime curavistis ex quibus admiractionis causam merito assumpsimus vehementem. Quodcirca ad ipsorum nuntiorum supplicactionem humilem nobis factam propterea vobis iterato dicimus et districte precipiendo mandamus sub pena nostre gratie et mercedis quatenus mandata nostra preinserta exequamini et compleatis omnibus dilactionibus et exceptionibus frivolis postpositis et semotis prout in hipsis licteris est vobis traditum in mandatis taliter vos in hiis habendo quod amodo pro parte dicti comunis non videamus aliquem ractione premissa in nostri presentia contra iustitiam conquerentem nec propterea nos opporteat vobis scribere iterato. Alias scire vos volumus quod pro culpa si quam commiseritis in premissis vos graviter puniremus. Datum Valentie decima quarta die februarii anno a nactivitate Domini millesimo trecentesimo quinquagesimo tertio. – Ex auctoritate regia.