Il re D. Pietro IV. di Aragona autorizza con sue lettere patenti i notai, o scrivani del Comune di Pisa, che si trovassero, o andassero in Sardegna per esercitarvi le funzioni loro affidate dal Comune, all’esercizio eziandio del notariato pubblico, durante il tempo del loro uffizio, accordando ai medesimi facoltà di rogare stromenti fra i pisani, e per cose appartenenti al detto Comune, ed uomini di Pisa, purché però in ciascun atto spieghino, che ciò eseguiscono, come ogni altro notaio pubblico, in virtù della speciale autorizzazione regia stata loro accordata.

(1353, 14 febbraio).

Dall’Archivio I. R. delle Riformagioni di Firenze, Classe XI. Atti Pubblici, Distinzione 3.^a, Tom. 23, Docum. N.° 31.

In eterni Dei nomine amen. Hoc est exemplum quarundarum licterarum trasmissarum ab illustri et serenissimo principe domino Petro Dei gratia rege Aragone Valentie Maioricarum Sardinee et Corsice comiteque Barchinone Rossilionis et Ceritanee Regemtibus (1) et officialibus suis  ynsule Sardinee, ad petitionem et instantiam pisani Comunis; quarum licterarum tenor talis est.

Nos Petrus Dei gratia rex Aragone Valentie, Maioricarum Sardinee et Corsice comesque Barchinone Rossilionis et Ceritanee actendentes nos dudum ad suplicationem nobilis et dilecti Iohannis de Herisiis decretorum doctoris consiliarii nostri, et Francisci Merolla ambaxiatorum tunc per venerabile Commune pisarum ad nostram magestatem regiam destinatorum provisionem infrascriptam fecisse; cum carta nostra continentie subsequentis. Nos Petrus Dei gratia Rex Aragone. Quia per nobilem Iohannem de Herisiis decretorum doctorem consiliarium nostrum dilectum et Francischum Merolla cives et ambaxiatores venerabilis Comunis pisarum, ad nostre magestatis presentiam destinatos, est nobis humiliter supplicatum, et concedere dignaremur notariis qui in Sardinea erunt pro tempore in officio pisarum Comunis, ut eis liceret facere et conficere ac rogare instrumenta quecumque in factis et pro factis pisarum Comunis et etiam quorumlibet pisanorum pertinentibus quandocumque ad Comune pisarum pertinentibus quandocumque ad Comune pisarum sive ad pisanos; que instrumenta haberent roboris firmitatem ac si essent confecta per notarios et nomine notariorum nostra regia auctoritate creatorum. Nos eidem Comuni complacere volentes, super predictis sic ducimus providendum, quod dictum Comune vel pro parte ipsius, dum dicti offitiales annis singulis ad predicta creantur, nominentur et designentur Gubernatori nostro dicti Sardinee regni, qui est vel fuerit pro tempore vel eius locum tenenti, nomina dictorum electorum, et idem Gubernator vel eius locum tenens illis durantibus in officio potestatem tribuat atque eos in notarios pubblicos creet nostra regia auctoritate; Ita tamen quod inter predictos pisanos et in factis sive negotiis dicti Comunis et etiam pisanorum durante regimine dictorum officiorum eis commissorum possint conficere contractus et instrumenta qui et que in iudiciis et extra inter predictos Comune et pisanos ac eorum districtuales habeant roboris firmitatem ac si facti vel facta essent per notarios auctoritate Magestatis regie procreatos, ipsis tamen notariis in subscriptionibus suis affirmantibus auctoritate nostra regia se ad predictos contractus iniendos dumtaxat fore creatos. Quia eorum officiis durantibus illos haberi volumus in predictis ac si per nos vel nostra fuissent auctoritate creati. Mandantes expresse Gubernatori Sardinee presenti et qui pro tempore fuerit quatenus concessionem nostram hanc quantum nobis placuerit durare volumus firmam habeant et observent et contra eam venire in aliquo non attemptent. Quinimo predictis sibi annis singulis nominandis nomine et vice nostri auctoritatem tribuant in predictis, quoniam eidem Gubernatori presenti et qui pro tempore fuerit vel eius locum tenenti vices nostras plene commictimus, in hac parte. In cuius rei testimonium presentem cartam nostram fieri iussimus sigillo nostro pendenti munitam. Datum Valentie decimo kalendas februarii anno Domini millesimo trecentesimo quadragesimo nono. Et nunc fuerit nobis per Iohannem Buzzacarini de Sismundis militem et Iohannem de Heritiis decretorum doctorem consiliarium nostrum predictum nuntios per dictum Comune ad nostram presentiam noviter destinatos humiliter supplicatum ut provisionem predictam ac contenta in dicta carta confirmare de nostri clementia dignaremur. Idcirco ipsorum nuntiorum supplicatione admissa benigne notavimus volentes erga dictum Comune favorabiliter nos habere provisionem predicta et omnia et singula in dicta carta contenta de spetiali gratia serie presentium confirmamus prout in eadem latius ac plenius continetur. Mandantes cum presenti Gubernatori Sardinee qui nunc est vel pro tempore fuerit aut eius locum tenenti quatenus provisionem predictam sub dicta forma et confirmactione huius teneat firmiter et observetur quam diu nobis placuerit ut prefertur et non contraveniat nec aliquem contravenire permictat aliqua ractione. In cuius rei testimonium presentem cartam nostram inde fieri et sigillo nostro pendenti iussimus communiri. Datum Valentie decima quarta die februarii anno a nactivitate Domini millesimo trecentesimo quinquagesimo tertio. Ex auctoritate regia.

NOTE

(1) Regentibus (?).