Nicolò di Cassano D’Oria, per sé, e pe’ suoi fratelli Enrietto, Antonio, Guglielmo, Tebaldo, e Odoardo, Luca di Mariano D’Oria, e Anfreone di Alaone D’Oria, conferiscono ampio mandato al giurisperito Alaone D’Oria per stringere a loro nome col Comune di Genova tutti gli accordi, contratti, e leghe che saranno necessarie per la difesa delle terre, ville, castella, luoghi, e dritti, ch’essi possedono in Sardegna, e della parte loro spettante nella terra, luogo, e castello di Alghero (Allegerii), contro il re di Aragona, e i Catalani.

(1353, 2 gennaio).

Dai Regii Archivi di Corte di Torino, Docum. ant. Serie 1.^a, Mazz. 8, Num. 7.

In nomine Sancte et individue Trinitatis Patris filii et Spiritus Sancti amen. Ad honorem et exaltationem Curie celestis, illustris viri domini domini Ducis Ianuensis et communis Ianue, omniumque Ianuensium, et ad conquassationem et detrimentum Regis Aragonum, et Catalanorum omnium. Nobiles viri domini Nicolaus de Auria filius quondam domini Casani de Auria militis suo proprio nomine, et nomine et vice Henrietti, Anthonii, Juliani, Tebaldi, et Oddoardi fratrum suorum, pro quibus ad cautelam de racto habendo promixerunt michi notario infrascripto recipienti vice, et nomine omnium quorum interest, vel intererit, sub ypotheca, et obligatione omnium bonorum suorum, nec non et Lucas de Auria filius et heres quondam domini Mariani de Auria suo proprio nomine, et Anfreonus de Auria filius quondam domini Alaonis de Auria suo proprio nomine, omnes simul suis propriis nominibus, et nominibus quibus supra fecerunt, constituerunt, et ordinaverunt suum certum actorem, procuratorem, et nuntium specialem, prout melius fieri, et esse potest, dominum Alaonum de Auria juris peritum presentem, et mandatum sponte suscipientem ad comparendum, et se presentandum coram magnifico domino et domino Duce Ianuensi et suo consilio, et coram alio quocumque domino principe, vel barone, et ad paciscendum, componendum, et transigendum cum predicto domino Duce et suo consilio, vel cum alia quacumque persona, corpore, vel collegio, et quamcumque compositionem, transactionem; pactionem, vel ligam faciendum de terris, castris, locis, villis, juribus, homagiis, et jurisdictionibus, que et quas ipsi habent, et sui predecessores soliti sunt habere in insula Sardinie, et ad obligandum eos in personis, et in bonis, que habent tam in insula Sardinie, quam in territorio civitatis, vel districtu Ianue, in quantum videbitur, et placuerit dicto procuratori suo, et ad vendendum, pignorandum, obligandum, et specialiter ad donandum; si et quando videbitur dicto procuratori suo, omnes terras, villas, castra, homagia, jura, et jurisdictiones, que et quas ipsi dicti constituentes et sui predecessores soliti sunt habere in insula Sardinie, et specialiter ad vendendum, obligandum, et si dicto procuratori videretur, ad donandum partem eis scilicet constituentibus contingentem terre, loci, castri Allegerii positi in insula Sardinie, cum omnibus juribus, et jurisditionibus que ipsi, et sui predecessores habent, et soliti sunt habere in dicto loco; asserentes, et manifeste recognoscentes, et dicentes in personis mei notarii, et testium infrascriptorum omnem donationem, venditionem, vel obligationem, compositionem, et ligam factam, vel fiendam in futurum per dictum procuratorem suum procedere, et fieri de speciali suo mandato, et eis hoc specialiter mandantibus eidem procuratori suo, jurantes etiam in manibus mei antedicti notarii, et in personis testium infrascriptorum se habituros ractam, gratam et firmam omnem donationem, venditionem compositionem, et ligam factam, et fiendam per prefatum procuratorem suum, et contra donata, vendita, et transacta per predictum procuratorem suum nunquam venturos; et generaliter ad faciendum in omnibus, et per omnia in predictis omnibus prout et sicut ipsi constituentes met facere possent si presentes essent, et ad constituendum unum procuratorem, et plures loco sui cum simili, vel alio mandato, et constitutum revocandum. Dantes et concedentes eidem procuratori suo, vel substituendo plenam, liberam, largam et generalem administracionem, cum pleno, libero, largo, et generali mandato, ac plena potestate, et baylia. Promittentes michi notario infrascripto officio publico tanquam publice persone stipulanti, et recipienti nomine et vice omnium quorum interest, intererit, vel in futurum interesse poterit, habere, et tenere ractum, gratum, et firmum quidquid, et quantum per dictum procuratorem eorum, vel substituendum, vel substituendos ab eo actum, factum, gestum, procuratum, vel etiam administratum fuerit in predictis, et quolibet predictorum, sub ypotecha, et obligatione omnium suorum, et cuiuslibet eorum. Actum Allegerii in camera domus condam domini Fabiani de Auria anno Dominice nativitatis millesimo trecentesimo quinquagesimo tertio, indictione quarta secundum cursum Ianue die secunda januarii post nonam, presentibus testibus domino Petro de Auria vicario Allegerii, Fabianeto de Auria, Santolino de Naviza, et Anthonio Medico ad hec vocatis, et rogatis.

(L. T.) Ego Hadotus Oddonis Sfolie auctoritate imperiali notarius rogatus scripsi.

Senza sigillo.