II
Bolla di Papa Clemente V. con la quale si dichiara, onde perpetuarne la memoria, che gli ambasciatori di Giacopo II. re di Aragona confessarono di avere il loro sovrano ottenuta la Sardegna per concessione della Sede Apostolica.
(1304, 28 maggio).
Dal Lunig. Cod. Ital. Diplom. Tom. IV. col. 1385.
Clemens etc. ad perpetuam rei memoriam.
Ne in posterum rei gestae memoriam diuturnitas temporis forsan oboleat, praesentium insinuatione testamur, quod accedentes olim ad praesentiam piae memoriae Benedicti Papae XI. praedecessoris nostri dilecti filii Vitalis de Villanova miles, et Guillelmus de Lateria civis Barchinonensis procuratores, nuntii, et ambasciatores charissimi in Christo filii nostri Iacobi regis Sardiniae et Corsicae illustris, et recognoscentes quod idem rex ratione regni Sardiniae et Corsicae ad Romanam Ecclesiam pertinentis, quod felicis recordationis Bonifacius VIII. praedecessor noster sibi et haeredibus suis sub certis modis et conditionibus in perpetuum feudum concesserat; cui quidem Bonifacio praedictus rex ipse personaliter pro eodem regno vassallagium ligium, et homagium fecerat, et iuramentum fidelitatis praestiterat, tenebatur cuilibet romano Pontifici infra annum post creationem ipsius per procuratorem, seu procuratores suos, ad hoc legitime constitutos, similiter pro eodem regno vassallagium ligium, et homagium facere, et iuramentum praestare, literas suas, eius aurea bulla bullatas, modos, conventiones, et conditiones huiusmodi plenarie continentes, in quibus idem rex recognosceret, se dictum regnum sub eisdem modis, conditionibus, et conventionibus in feudum a Romana Ecclesia praedicta tenere, eoque se promitteret servaturum; procuratorio nomine dicti regis pro eodem regno in ipsius Benedicti praedecessoris et fratrum suorum praesentia constituiti infra annum post creationem ipsius huiusmodi vassallagium ligium, et homagium fecerunt, ac praestiterunt in ipsius regis animam huiusmodi iuramentum; sibique postmodum infra mensem praesentaverunt et exhibuerunt ex parte regis eiusdem literas ipsi, eius aurea bulla bullatas, in quibus non solum modi, conditiones, et conventiones praedictae, sed etiam totus tenor literarum Bonifacii praedecessoris super concessione huiusmodi confectarum inseritur; recognoscendo et confitendo procuratorio nomine dicti regis, quod idem rex regnum praedictum sub ipsis modis, conditionibus, et conventionibus receperat; ipsosque modos, conditiones, et conventiones dicto nomine observare per omnia promiserunt, prout semper iis plenam ab eodem rege acceperant potestatem, sicut de eadem potestate constabat per instrumentum publicum dicti regis simili munimine roboratum; quae quidem literae, et instrumentum praesentata, ut praedicitur, dicto praedecessori Benedicto in archivio dictae Romanae Ecclesiae reservantur. Dictusque Benedictus praedecessor huiusmodi vassallagium ligium, et homagium, recognitiones et promissiones factas, et iuramenta praestita a dictis procuratoribus praefati regis nomine, ut praefertur, de praedictorum fratrum consilio acceperit; quamvis, eodem Benedicto praedecessore morte prevento, dicti procuratores, et nuntii literas eius super hoc habere necquiverunt, prout haec omnia ex eorundem fratrum assertione nobis constant, quibus fidem plenariam adhibemus etc. Datum Burdegalae V. kal. iunii, anno I.