Bolla di Papa Innocenzo II, con cui è conceduto al Capitolo della Chiesa di s. Lorenzo di Genova privilegio apostolico per le chiese e pe’ beni che possedeva in Sardegna.
(1136, 7 dicembre).
Dall’Archivio della Chiesa di s. Lorenzo di Genova, libro P. B. Car. 32.
Innocentius Episcopus servus servorum Dei, dilectis filiis Guidoni Preposito, et Canonicis matricis Ecclesiae s. Laurentiis Ianuensis, tam praesentibus quam futuris in perpetuum. Apostolicae Sedis nos monet auctoritas ecclesiarum omnium curam et sollicitudinem gerere, et eas sub protectione S. Romanae Ecclesiae gremio confovere. Eapropter dilecti in Domino filii vestris rationalibus postulationibus clementer annuimus, et Beati Laurentii Ecclesiam in qua omnipotenti Deo deservitis, Apostolicae Sedis privilegio communimus. Statuimus enim ut qualescumque possessiones, quaecumque bona ecclesiarum in praesentiarum iuste et canonice possidet, aut in futurum concessione Pontificum Regum vel Principum, oblatione fidelium, seu aliis iustis modis praestante Domino poterit adipisci, firma vobis, vestrisque successoribus, et illibata permaneant. Haec propriis nominibus adnotanda subiunximus. In iudicatu Calaritano sex Curtes, videlicet Quartum, Arsemine, Caput Terrae, Sepollum, Aquam Frigidam, Fontana de Cages cum omnibus ad eas pertinentibus, quas nimirum Marianus illustris Caralitanus iudex pro animae suae remedio, et retributione honoris vestrae matrici Ecclesiae Beati Laurentii contulit, ex quibus utique postea tres sibi consensu accipiens vestro, sex alias, scilicet Sabbathum, Paudum, Barali, Frascasali, Forcellam, Sanctam Victoriam de Villa Porporei, ubi dicitur Torreste, cum omnibus pertinentiis suis Ecclesiae vestrae restituit pro cambio earum trium, scilicet Quartum, Caput Terrae, Aquae Frigidae; quod utique concambium hoc tenore factum est, ut si vestra Ecclesia detrimentum in ipso pateretur, tres priores collatas sibi curtes, sine calumnia et contradictione recipiet (1). Confirmamus et vobis Ecclesiam s. Iohannis de Arsemine cum ecclesiis suis, et caeteris ad eam pertinentibus, quae vobis a venerabili fratre nostro Guillielmo Caralitano archiepiscopo est tradita, et scripti sui munimine roborata, ipso judice, cum uxore sua Pretiosa, et consanguineis seu parentibus collaudante, et instantius exorante (2), Decernimus ergo ut nulli omnino hominum liceat vestram Ecclesiam temere perturbare, aut possessiones auferre, vel ablatas retinere, minuere, aut aliis vexationibus fatigare, sed omnia integra conserventur vobis, vestrisque successoribus in perpetuum. Si qua igitur in futurum ecclesiastica, saecularisque persona hanc nostrae constitutionis paginam sciens contra eam venire tentaverit, secundo commonita si non satisfecerit, potestate, honorisque sui dignitate careat, et a Sanctissimo Corpore, et Sanguine Dei, et Domini Redemptoris nostri Iesu Christi aliena fiat. Conservantibus autem sit pax Domini nostri. Quatenus et hic fructum bonae actionis percipiat, et apud districtum Iudicem praemia aeternae pacis inveniat.
Ego Innocentius Catholicae Ecclesiae Episcopus subscripsi.
Ego Guillielmus Praenestinus Episcopus subscripsi.
Ego Anselmus Presbiter Cardinalis subscripsi.
Ego Lucas Presbiter Cardinalis titulo Ss. Ioannis et Pauli subscripsi.
Ego Guido indignus Sacerdos subscripsi.
Ego Gregorius Diaconus Ss. Sergii et Bachi subscripsi.
Ego Grisogonus Diaconus Card. S. Mariae in Porticu subscripsi.
Datum Pisis per manum…Sanctae Romanae Ecclesiae Diaconi Cardinalis et Cancellarii VII idus decembris, indictione XIIII, Incarnationis Dominicae MCXXXVI. Pontificatus vero Domini Innocentii Papae II. anno VII.
NOTE
(1) Si accenna alla donazione di sei corti fatta nel 1108 da Mariano (Torchitorio II) di Cagliari alla chiesa di s. Lorenzo di Genova, e alla permuta di tre delle suddette corti seguita nel 29 giugno 1120. (Ved. sopr. Diplom. VI e XXIX).
(2) La donazione di Guglielmo arcivescovo di Cagliari confermata dal papa, è quella già prodotta più sopra al N° XXVII.