Repertorio informatizzato delle fonti documentarie e letterarie della Sardegna

Repertorio informatizzato delle fonti documentarie e letterarie della Sardegna

Secolo XII – LXV

Il Pontefice Adriano IV conferma con nuovo privilegio della Sede Apostolica ai canonici del capitolo di S. Lorenzo di Genova tutto ciò ch’essi possedevano, sia dentro che fuori del territorio della Repubblica, e specialmente nell’isola di Sardegna.

(1158, 15 giugno).

Dall’Archivio di S. Lorenzo di Genova, lib. P. B., cart. 33.

Adrianus Episcopus servus servorum Dei dilectis filiis Ugoni archidiacono, et Oberto praeposito, ceterique canonicis S. Laurentii ianuensis ecclesiae tam praesentibus quam futuris canonice substituendis in perpetuum. Effectum iusta postulantibus indulgere, et vigor aequitatis, et ordo exigit, rationis praesertim quando voluntatem et pietas adiuvat, et reliquas non reliquit. Ea propter dilectis in Domino filiis iustis postulationibus gratum impertientes assensum praefatam Beati Laurentii ecclesiam in qua divino mancipati estis obsequio ad exemplar praedecessorum nostrorum felicis memoriae Innocentii et Eugenii Romanorum Pontificum sub Beati Petri, et nostra protectione suscipimus, et praesentis scripti privilegio communimus. Statuentes ut quascumque possessiones, quaecumque bona, eadem ecclesia in praesentiarum iuste, et canonice possidet, aut in futurum concessione Pontificum, largitione Regum, vel Principum, oblatione fidelium, seu iustis modis, Deo propitio, possit adpisci, firma vobis, vestrisque successoribus, et illibata permaneant. In quibus, quae propriis duximus exempla vocabulis, capellam S. Mariae Magdalenae, capellam S. Iacobi de Calignano, capellam S. Ioannis de Sexto, capellam Sanctae matricis Mariae de Quarto, capellam S. Stephani de Panisi, capellam S. Bartholommaei de Staglieno, capellam S. Antonii de Auripalatio, capellam S. Margaritae de Marassi, capellam S. Mariae de Quetio, capellam S. Ambrosii Vegula, altare Apostolorum Philippi et Iacobi, situm in ecclesia Beati Stephani, capellam Beati Michaelis, quae infra eamdem ecclesiam Beati Stephani commoretur, Beati Ioannis Evangelistae sitam in loco ubi dicitur Paveranum, et capellam SS. Salvatoris de Sarzano sitam in praedio, vobis iuste dato et concesso a consulibus ianuensibus, decimas quascumque in tota ianuensi dioecesi canonice possidetis, et tres partes totius territorii, quod vocatur Sanctus Romulus, cum omnibus pertinentiis suis, quemadmodum a bonae memoriae Teodulfo ianuensi Episcopo ecclesiae vestrae rationabiliter concessae, et scriptis suis auctoritate firmatae sunt. Praeterea insulam in Hibero flumine positam iuxta civitatem Tortuosam ab illustri viro Raimondo Barchinonensi comite, et a consulibus vestrae civitatis eidem ecclesiae istae vobis concessam pariter affirmamus. Insuper in Iudicato Caralitano sex curtes, videlicet, Quartum, Arseminam, Caput-Terrae, Sepollum, Aquam-Frigidam de aquas cum omnibus ad eas pertinentibus, quas nimirum Marianus Caralitanus illustris iudex pro animae suae remedio, et restitutione honoris vestrae matrici ecclesiae Beati Laurentii contulit. Ex quibus utique postea tres sibi consensu vestro accipiens, sex alias scilicet Sabathum, Paudum, Baral, Tracasali, Forcellam, Sanctam Victoriam de villa Populei, ubi dicitur Torresse, cum omnibus pertinentiis suis, sine calumnia, et contradictione reciperet. Confirmamus etiam vobis ecclesiam S. Ioannis de Arsemine cum ecclesiis suis et caeteris ad eam pertinentibus, quae vobis a venerabili fratre nostro Guglielmo Caralitano archiepiscopo est tradita, et scripti sui munimine roborata, ipso iudice cum uxore sua Pretiosa, et consanguineis ac parentibus collaudante, et instantius exorante, antiquas et rationabiles consuetudines ecclesiae vestrae vobis nihilominus confirmamus (1). Decernimus ergo ut nulli omnino hominum liceat praefatam ecclesiam temere perturbare, aut ei possessiones auferre, et ablatas retinere, minuere, aut aliquibus vexationibus fatigare, sed omnia integra conserventur vestris, et aliorum, quorum pro gubernatione et sustentatione concessa sunt usibus comodis profutura. Salva Sedis Apostolicae auctoritate, et dioecesanorum episcoporum canonica iustitia. Si qua igitur in futurum ecclesiastica, secularisve persona hanc nostrae constitutionis paginam sciens, et eam temere perturbare, et contravenire tentaverit, secunda actione commonita, si non satisfactione emendaverit, potestatis, honorisque sui dignitate careat, eamque se divino iudicio existere, de perpetrata iniquitate cognoscat, et a sacratissimo corpore et sanguine Dei et Domini Redemptoris nostri Iesu Christi aliena fiat, atque in extremo examine districtae ultionis subiaceat.

Cunctis autem eidem loco iusta servantibus sit pax Domini nostri Iesu Christi. Quatenus et hic fructum bonae actionis percipiant, et apud districtum Iudicem praemia aeternae pacis inveniant. Amen, amen, amen.

Ego Adrianus Catholicae Ecclesiae episcopus subscripsi.

Ego Ubaldus presb. card. tituli S. Praxedis subscripsi.

Ego Iulius presb. card. tituli S. Marcelli subscripsi.

Ego Bernardus presb. card. tituli S. Clementis subscripsi.

Ego Ottavianus presb. card. tituli S. Ceciliae subscripsi.

Ego Gerardus presb. card. tituli S. Stephani in Monte Celso subscripsi.

Ego Ildebrandus presb. card. basilicae XII Apostolorum subscripsi.

Ego Guido presb. card. tituli S. Callisti subscripsi.

Ego Albertus presb. card. tituli S. Laurentii in Lucina subscripsi.

Ego Baso diaconus card. Ss. Cosmae et Damiani subscripsi.

Ego Curthyus diac. card. S. Adriani subscripsi.

Ego Petrus diaconus card. S. Eustachii iuxta templum Agrippae subscripsi.

Ego Raimondus diac. card. S. Mariae in via lata subscripsi.

Datum Sutri per manum Rolandi S. R. E. presb. card. et cancellarius XVII kalendas iulii, indictione VI , anno MCLVIII, pontificatus vero domini Adriani papae IV anno IV.

NOTE

(1) Ved. sopr. Document. N° XXVII.