XXXVII.
L’infante Don Alfonso di Aragona ordina la restituzione a favore del Comune di Sassari dell’antico dritto di riscossione di un denaro per lira, solito pagarsi nel porto di Torres per la importazione ed esportazione di generi, e merci di ogni specie; il qual dritto, destinato specialmente per la manutenzione di quel porto, pel riattamento e l’ampliazione del molo, e per la costruzione di due torri, era stato arbitrariamente applicato al tesoro Regio.
(1326, 26 dicembre).
Dagli Archivi ant. della Città di Sassari.
Nos Infans Alfonsus Illustrissimi Domini Regis Aragonum primogenitus, eiusque generalis procurator, ac comes Urgelli. Intellecto, nobisque exposito per ambaxiatores ad nos destinatos ab universitate civitatis nostre Sassari, quod a longo tempore citra statutum et usum fuit exigi, levari et colligi a Sassariensibus et quibuslibet aliis personis ad portum de Turribus venientibus, pro introitu videlicet et exitu, denarium pro libra, pro mundatione dicti portus, et aptatione moduli ipsius et constructione turrium in dicto portu, et eius modulo fatiendarum, pro custodia lignorum et vasorum ad dictum portum venientium, et mercium ac aliorum ferendorum ad illum.
Intellecto etiam quia ex eo quod dictus denarius applicatus fuit a modico tempore citra redditibus camere nostre portus iam dictus plurimum devastatur. Quia circa incrementum et emolumentum civitatis nostre Sassari, et directionem et conservationem dicti portus favoris nostri auxilium intendimus efficaciter impartiri, idcirco tenore presentis carte nostre concedimus et statuimus quod ab hac die in antea dictus denarius exigatur et colligatur a predictis venientibus ad dictum portum tam in introitu quam exitu per aliquem quem in hoc ponere et statuere, et ab inde removere possimus ad libitum, et per ipsum convertatur in mundacionem dicti portus, et aptacionem vel reparacionem eiusque moduli, et construcionem dictarum turrium, et custodiam omnium predictorum. Et deinde dictus denarius camere nostre minime applicetur, aut ad ulla alia nisi ad predicta nullatenus convertatur. Mandantes gubernatori generali, et administratoribus generalibus reddituum et iurium ipsius insule, ac potestati et camerlingo Sassari, nec non aliis universis et singulis officialibus nostris insule predicte presentibus et futuris, quatenus concessionem et statutum nostrum huiusmodi observent et teneant, et observari, et teneri faciant, nec contra ipsum veniant in aliquo, aut attemptent. In cuius rei testimonium presentem cartam nostram inde fieri iussimus nostro sigillo pendenti munitam. Data Turolii septimo kals ianuarii, anno Domini millesimo trecentesimo vicesimo sexto. – Sigillat. –