Lettere clientelari di Alfonso re di Aragona, e di Sardegna al Pontefice Benedetto XII.
(1335, 4 ottobre).
Dal Lunig. Cod. Ital. Diplomat. Tom. IV. col. 1391-92-93-94.
Sanctissimo ac beatissimo in Christo Patri et Domino, Domino Benedicto, divina providentia sacrosanctae romanae ac universalis Ecclesiae summo Pontifici, Alphonsus Dei gratia rex Aragonum, Valentiae, Sardiniae, et Corsicae, ac comes Barchinonae humilis eius filius pedum oscula beatorum.
Sanctitati vestrae tenore literarum praesentium nostrarum patefiat quod viso, ac plenarie intellecto papali rescripto super concessione, collatione et donatione confecto, quam felicis recordationis dominus Bonifacius Papa VIII. praedecessor vester fecit illustri domino Iacobo felicis memoriae regis Aragonum patri nostro, suisque haeredibus in perpetuum feudum de regno Sardiniae et Corsicae cum iuribus omnibus, et pertinentiis suis sub certo servitio sub certisque conditionibus largius conscriptis in praedicto rescripto continentiae sequentis: = Bonifacius = etc. (1): Idcirco attendentes praedictum dominum regem Iacobum felicis recordationis genitorem nostrum, tempore donationis praemissae memorato domino Papae Bonifacio recolendae memoriae iuxta continentiam dicti rescripti, ex causis in eo scriptis, iuramentum, fidelitatem, vassallagium, et homagium personaliter praestitisse, et postmodum per procuratores suos et nuncios speciales iuramentum fidelitatis, vassallagium, et homagium praedicta renovasse, fecisse, et praestitisse aliis romanis pontificibus, qui dicto domino Papae Bonifacio in apostolatus praeminentia successerunt, et per eosdem nuncios dedisse litteras suas aureas eius bulla bullatas recognitionis, et acceptationis contentorum in rescripto praedicto iuxta eiusdem tenorem, et nos etiam, qui dicto domino regi genitori nostro in praedicto Sardiniae et Corsicae regno, et aliis regnis et terris suis successimus, praedictum iuramentum, fidelitatem, vassallagium, et homagium, quae domino Ioanni felicis recordationis Papae XXII. praedecessori vestro personaliter secundum formam dicta donationis facere tenebamur, fecimus, et praestitimus personaliter domino Ioanni bonae memoriae patriarchae Alexandrino fratri nostro, recipienti nomine et vice dicti domini Papae Ioannis, qui hoc ipsi domino patriarchae cum speciali suo rescripto commisit, et dedimus inde similes literas nostras aurea bulla bullatas recognitionis, et acceptationis in rescripto praedicto contentorum, considerantes etiam nos nunc ex eiusdem rescripti supra inserti serie inductos nostrum procuratorem ad eadem iuramentum, fidelitatem, vassallagium, et homagium sanctitati vestrae praestanda et facienda constituisse cum publico scripto nostro, providimus propterea, sanctissime Pater, has fieri litteras bulla nostra aurea bullatas, sanctitati vestrae per dictum procuratorem nostrum tradendas, et dandas, prout fieri debere iam dicti superius inserti rescripti apostolici tenor inducit.
Per quas siquidem literas nunc et ex tunc modos, conventiones, conditiones, tenorem et formam in ipso papali rescripto conscriptos acceptamus expresse: et per quas etiam fatemur, et recognoscimus expresse praefatum dominum regem genitorem nostrum recepisse in feudum dictum Sardiniae et Corsicae regnum a domino Summo Pontifice et Romana Ecclesia, nosque illud pro eadem Romana Ecclesia tenere in feudum sub conditionibus, conventionibus, modo et forma, atque tenore, quae in dicto papali rescripto continentur; quos tenorem, modum, conditiones, conventiones, et formam promittimus inviolabiliter servaturos. Pro quorum observantia obligamus nos et dictum regnum Sardiniae et Corsicae, iura et bona nobis competentia et competitura in eo. Humani generis conditor, et redemptor personam vestram ad sua sancta servitia conservare dignetur per tempora longiora. Datum Barchinone IV nonas octobris anno Domini MCCCXXXV.
(1) Qui vi è inserta per intero la Bolla del 5 aprile 1297, con la quale Papa Bonifazio VIII. concedette in feudo a Iacopo II. re di Aragona l’isola di Sardegna, e gliene diede la solenne investitura. La qual bolla riportammo per esteso fra i diplomi e le carte del secolo XIII. (Ved. sopr. N.° CXXXVIII).