Carta Reale di D. Pietro di Aragona, con la quale, dichiarate di proprietà regia, e quindi inalienabili in perpetuo le saline dello Stagno, e della Nurra, e le ville di Bonvehi, Manussades, e Montcort, si danno alcuni provvedimenti per la vendita del sale in Alghero, e anche in Sassari, allorché questa città tornerà sotto il dominio della Corona.
(1370, 15 novembre).
Dagli Archivj antichi della città di Alghero.
Nos Petrus Dei gratia rex Aragonum, Valenciae, Maioricarum, Sardiniae, et Corsicae, comesque Barchinonae, Rossilionis et Ceritaniae. Quoniam deliberatione plena habita comperimus, quod ex subscripto iura nostra Capitis Lugudorij maximum melioramentum suscipient, cum dignabitur dominus statum insulae Sardiniae in melius commutare, ideo ipsum melioramentum affectantes, tenore praesentis cartae nostrae cunctis temporibus valiturae, providemus, sancimus, et ordinamus quod stagna salinarum villarum de Nurra quae villae nunc vacant per mortem Petri Alberti quondam militis gubernatoris Lugudorij, et iura redditus, et emolumenta ipsorum stagnorum et salinarum, sint nostra, et successorum nostrorum perpetuo, et redditibus et iuribus nostris dicti Capitis Lugudorij ita annexa, quod nullo unquam tempore quavis ratione seu causa seu quovis modo seu titulo inde valeant separari, nec nobis vel successoribus nostris liceat unquam de caetero de dictis stagnis vel salinis, vel parte eorum, donationes aliquas, concessiones, vel assignationes facere perpetuas vel temporales, et si fierent de caetero, vel si forte iam factae sint, eas tanquam iuribus nostris valde damnosas cassamus et irritamus, et carere volumus omnimodo roboris firmitate, imo administrator redituum, et iurium nostrorum dicti Capitis Lugudorij, qui nunc est et erit pro tempore, dicta stagna tanquam redditus nostros proprios administret ad utilitatem curiae nostrae prout stagna in quibus fit sal administrari consueverunt et debent, salque inde proveniens, in villa Alguerii quae salinas non habet vendi faciat, vel si ei videbitur in civitate Sasseri quando recuperavimus eam. Providemus insuper, et sancimus, ac ordinamus perpetuo, quod nec in aliqua parte termini praedictae villae Alguerij, nec in Castro seu villis de Bonvhei, nec in villis, seu locis de Manussades, et de Muntcort, nec terminis ipsius vel ipsarum, sit alicui licitum sal vendere, nisi tantum in dicta villa Alguerij, in qua ipsum sal prout vendi consuevit vendatur per gabellotum nostrum dicti salis, et non per alium ullomodo, nec absque voluntate ipsius gabelloti, lembum aliquod vel vassellum sal alicuius naturae discaricet unquam de caetero in dicta villa Alguerij, vel Castro, et villis praedictis seu terminis earundem. Caeterum providemus, et ordinamus perpetuo, nobisque legem imponimus quod villas praedictas de Manussades, et de Muntcort quas dicto Petro Alberti dederamus, seu assignaveramus loco pignoris quousque fecissemus sibi complementum, ad sexcentas libras alfonsinarum in redditibus quos in dicta Sardiniae insula super villis vacantibus dederamus, quaequidem villae per obitum dicti Petri ad nostrum patrimonium redierunt, nunquam de caetero donemus, vel alienemus, seu assignemus quavis ratione, nec quovis titulo sive causa, quinimo dictus administrator praesens et futurus, eas tanquam patrimonium nostrum administret, et earum redditus, exitus, et iura, in solutione salarij vicariae dictae villae Alguerij convertat, sui salario ipsos redditus, exitus, et iura perpetuo assignamus. Et si forsan per oblivionem, vel etiam de certa scientia aliquam donationem vel translationem, aut alienationem, de ipsis villis, vel earum redditibus, et iuribus, aut parte ipsorum, nos vel successores nostros facere contingeret, vel si per expectationem, aut alias iam factae sint eas huius serie revocamus, nec aliquam habeant firmitatem. Mandamus itaque huius serie gubernatori Lugudorij, ac dicto administratori caeterisque officialibus, et subditis nostris dictae Sardiniae insulae, et aliis praesentibus et futuris, ut has nostras provisionem et ordinationem perpetuas firmas habeant perpetuo et observent, et contra non veniant, nec aliquem contravenire permittant aliqua ratione. In cuius rei testimonium, praesentem cartam nostram fieri iussimus, nostro sigillo impendenti munitam. Datum in Montealbo quintadecima die novembris, anno a nativitate Domini, millesimo, trecentesimo, septuagesimo, nostrique regni trigesimoquinto. Rex. P. In. S.ar P. de Gostemps. m R. X. P. P. d. marg. consil. et scpt P.
Rsta.