Il Doge di Genova sostituisce Domenico Facinanti a Pambello di Casale, e lo costituisce suo procuratore per l’oggetto, di cui nel precedente documento Num. CXXII.

(1360, 23 marzo).

Dai Regj Archivj di Corte di Torino, Documenti Genovesi, Serie 1.^a, Num. XX.

In Christi Dei nomine amen. Magnifficus et excelsus dominus dominus Simon Bucanigra Dei gratia januensis dux et populi defensor imperialis vicarius ac etiam amiratus generalis in presentia consensu et voluntate infrascriptorum consiliariorum suorum ancianorum comunis Ianue et ipsi anciani in presencia auctoritate et decreto prefati magniffici domini ducis in sufficienti et legiptimo numero congregati secundum statuta ordinationes et consuetudines civitatis Ianue, et quorum ancianorum nomina qui interfuerunt sunt hec videlicet Thomas Marchius prior, Anthonius de Viciano, Franciscus de Bonacorda, Bernabos de Primentorio, Nicholaus de Levante quondam domini Levantini, Anthonius Medicus, notarius Iaunynus de Belforte, Draperius et Hugolinus de Sexto de predictis etc. qui dominus dux et consilium possunt et bayliam habent et auctoritatem plenissimam in quibuscumque negociis comunis Ianue quantumcumque arduis ambaxatores procuratores et syndicos constituere et ordinare et ipsa negocia et quelibet ipsorum reformare et super ipsis statuere decernere et ordinare prout et sicut eisdem vissum fuerit expedire habentes plenam notitiam et certam scientiam de quodam instrumento sindicatus et procure facti et facte in personas prudentum virorum domini Francisci de Henrico jurisperiti, Gabriellis Adurni et Pambelli de Casali civium januensium scriptum manu Georgii Oddoardi de Clavaro notarii et canzellarii comunis Ianue hoc anno die ultima februarii, et de omnibus et singulis in dicto instrumento contentis attendentes dictum Pambellum interesse non posse ad exequendum ea que sibi fuerunt commissa quia de proximo est recessurus de Ianua pro mercimoniis suis fiendis ut est moris mercatorum, confidentes de legalitate providi viri domini Facinanti civis januensis omni modo via jure et forma quibus melius potuerit pro se ipsis et successoribus suis et nomine et vice dicti comunis Ianue et omnium et singulorum baronum marchionum comitum castellanorum et dominorum vassallorum feudatariorum subditorum et quarumcumque aliarum personarum et universitatum sequacium seu complicium et unitorum seu unitarum cum prefato domino duce et comuni Ianue fecerunt constituerunt creaverunt, et ordinaverunt loco dicti Pambelli supradictum Dominicum Fatinanti licet absentem ambaxatorem sindicum procuratorem actorem et nuncium specialem ad omnia et singula agenda tractanda facienda ordinanda et firmanda ad que suprascriptus Pambellus vigore suprascripti instrumenti sindicatus et procure scripti manu suprascripti Georgii notarii una cum suprascriptis domino Francisco et Gabriele Addurno fuerat ambaxator procurator et sindicus constitutus et ordinatus et qui ipse Pambellus si presens adesset una cum suprascriptis domino Francisco et Gabriele Adurno seu cum altero ipsorum facere potuisset seu posset vigore suprascripti instrumenti sindicatus scripti manu dicti Georgii – Dantes et concedentes nominibus suprascriptis supradicto Dominico in predictis et circa predicta et quodlibet ipsorum et connexis coherentibus et dependentibus ab iisdem plenum liberum et generale mandatum cum plena libera et generali administratione et speciali ubi exigetur speciale promittentes et jurantes ad sancta Dei evangelia corporaliter tactis scripturis mihi notario et canzellario infrascripto tamquam publice persone officio publico stipulanti et recipienti nomine et vice omnium et singulorum quorum interest intererit seu interesse poterit se se dictus nominibus perpetuo firmum ratum et gratum habituros omne id et totum quicquid per suprascriptum Dominicum ambaxatorem et sindicum suprascriptum una cum predictis domino Francisco et Gabriele ambaxatoribus et sindicis supradictis seu cum altero ipsorum factum gestum fuerit seu procuratum sub ypotheca et obligatione bonorum comunis Ianue volentes quod per presens mandatum non derogetur nec in aliquo derogatum esse intelligatur mandato suprascriptorum domini Francisci et Gabrielis, quorum mandatum voluerunt et mandaverunt per presens instrumentum esse potius confirmatum. Actum Ianue in Sarra superiori palacii ducalis comunis Ianue anno Dominice nativitatis millesimo trecentessimo sexagessimo indictione duodecima secundum cursum Ianue die vigesima tercia mensis marcii circha avemarias que pulsantur in sero presentibus testibus Nicholao de Caneto, Raffo de Canubio speciario, Bartholomeo Muscha de Levanto, et Petro de Reza, et Raphaele de Guascho notario et canzellario comunis Ianue ad hec specialiter vocatis.

Ego Conradus Mazurrus sacri imperii notarius et canzellarius prefati Magniffici domini domini ducis sui consilii et comunis Ianue predictis omnibus interfui et rogatus scripsi.