Il Doge di Genova ratifica il compromesso fatto dal suo procuratore Leonardo di Montaldo.

(1359, 9 settembre).

Dai Regj Archivj di Corte di Torino, Documenti Genovesi, Serie 1.^a, Num. XVI.

Exemplum instrumenti ratifficationis dicti compromissi facte per dictum dominum ducem etc.

In nomine Domini amen. Nos Symon Bucanigra Dei gratia dux januensis et populi defensor et imperialis vicarius, ac etiam amiratus generalis, Lanzalotus de Castro, Pambellus de Cassali, Gabriel Adurnus et Raffus Grifiotus quatuor officiales electi constituti et ordinati per prefatum dominum ducem, suum consilium ancianorum et officium guerre super infrascriptis etc. Habentes etiam a dicto domino duce consilio et officio guerre una cum eodem domino duce plenam largam et liberam potestatem et bayliam illam scilicet totam quam comune Ianue habet ex forma decreti ipsorum domini ducis consilii et officii guerre scripti et testati per Conradum de Corvaria notarium et canzellarium dicti domini ducis et comunis Ianue hoc anno die quinta julii – Audita et diligenter intellecta rellacione fidelis ambaxatoris nostri et dicti comunis Leonardi de Montaldo jurisperiti consiliarii nostri secreti dilecti, qui nobis prudenter retulit sinceritatem amoris et fidei quam ad nos honorem et statum nostrum comunis et populi ianuensis omniumque januensium habet et solicite gerit illustris princeps dominus Iohannes marchio Montisferrati carissimi fratris nostri et maxime super negocijs illustrissimum dominus regem Aragonum et subditos ipsius et nos et comune Ianue tangentibus occasione guerre et discordiarum existentium inter prefatum dominum regem eiusque subditos et nos et comune Ianue de quibus factum est latum plenum et generale compromissum nostro et dicti comunis Ianue nomine in persona prefati domini marchionis, per prefatum dominum Leonardum sindicum nuncium et ambaxatorem nostrum et dicti comunis super hoc a nobis potestatem habentem plenissimam per publicum instrumentum scriptum et testatum per Georgium Oddoardi de Clavaro notarium et canzellarium nostrum et comunis Ianue hoc anno die XXII.^a marcij, de quo quidem compromisso receptum est instrumentum scriptum et abreviatum per Stibiotum Stibium notarium et canzellarium prefati domini marchionis hoc anno die nona mensis aprilis. – Ecce quod ipsum compromissum vissum et diligenter examinatum et approbatum nostro et comunis Ianue nomine per prefatum dominum Leonardum nuncium sindicum et ambaxatorem nostrum et dicti comunis nomine nostro et ipsius comunis factum consulto et ex certa scientia omnia et singula in ipso compromisso contenta cum omnibus obligationibus realibus et personalibus in ipso compromisso comprehensis, etiam sententiam et sententias omniaque acta et secuta, et que secuta sunt et sequi debent ex ipso compromisso seu vigore ipsius in omnibus et singulis capitulis eorumdem ratifficamus et aprobamus per nos et successuros nomine nostro et dicti comunis Ianue et pro observatione predictorum nos et bona nostra dictique comunis Ianue ac ipsum comune subditosque et districtuales ipsius generaliter et specialiter obligamus prefato domino marchioni et notario et canzellario infrascripto tamquam publice persone stipulanti et recipienti nomine et vice omnium quorum interest et poterit interesse, in cuius notarii manibus omnia predicta corporaliter tactis scripturis juravimus et juramus ad sancta Dei evangelia per nos et successores nostros et dictum comune inviolabiliter observare. Promittentes atque jurantes quod per nostros procuratores vel procuratorem legiptime constitutos dabimus et fieri faciemus securitates atque cautelas pro observatione pacis pronunciande per prefatum dominum marchionem et pro omnibus et singulis que in eiusdem pronunciamento continebuntur coram sanctissimo domino nostro Papa coram quo personaliter et realiter nos et nostros subditos et comune Ianue promittimus effectualiter obligari cum omnibus clausulis et renunciationibus oportunis – Etiam promittimus prefato domino marchioni arbitro nostro facere obligationes personales et reales pro observatione dicte pacis in omnibus et per omnia sicut dictus dominus marchio duxerit ordinandum. Actum Ianue in nostro ducali palacio, videlicet in camera cubiculari nostra anno Dominice nativitatis millesimo tercentesimo quinquagesimo nono indictione undecima secundum cursum Ianue die nona septembris in vesperis presentibus testibus vocatis et rogatis egregio domino Ludovico Bucanigra capitaneo civitatis Saone Iofredo Bucanigra et Nicolao de Canneto ac Conrado Mazurro notario et canzellario dicti domini ducis et comunis Ianue. In cuius quidem rei testimonium presens publicum instrumentum jussimus sigilli nostri ducalis impressione muniri.

Ego Georgius Oddoardi de Clavaro imperiali auctoritate notarius et canzellarius magniffici domini ducis prefati et comunis Ianue suprascriptis omnibus et singulis interfui rogatus scripsi, meumque signum apossui consuetum ad cautelam et in testimonium premissorum.