Pietro IV Re di Aragona scrive a Mariano IV Giudice di Arborea per indurlo alla restituzione delle castella di Pedres, Bonvei, Terranova, Ardara, e Cepola coi territori, e co’ dritti alle medesime appartenenti, minacciando, in caso contrario, di voler agire con vigore pel ricuperamento di quelle fortezze.
(1355, 8 giugno).
Dal Fara, De Reb. Sard. Lib. III. pag. 294. Ediz. Tor.
Petrus rex etc. dilecto nostro iudici Arboreae, comiti Gociani, vicecomiti de Basso, salutem et dilectionem.
Opportunum existimatur, ac etiam consonum rationi, ut cuicumque restituatur, quod ab aliis indebite retinetur, ad quod Augustinus et canon ajunt: non dimittitur peccatun, nisi restituatur ablatum. Hinc est quod cum vos iamdiu est tenueritis et tenetis capta et occupata nostra sequentia castra, videlicet castrum vocatum Castellum Pedres, et castrum nominatum Bonvehi, castrum de Terranova, castrum de Ardara, et castrum de la Cepola cum eorum cujuscumque eorum terminis, territoriis, iuribus et suis pertinentiis universis: quae quidem castra cum dictis eorum terminis nostra fuerunt, et esse debent, pertinuerunt, et pertinere debent, nobisque restituere hactenus recusastis indebite et injuste, in damnum et detrimentum maximum vestrae animae et conscientiae, et nostri vilipendium et contemptum, percipiendo inde fructus, redditus, exitus et proventus, et alia jura ex eis proventa; et inde faciendo omnimodas vestras voluntates. Cum autem de iure, aequitate, et optima ratione, nec non auctoritatibus antedictis, vos deceat, et teneamini dicta castra et eorum quodlibet cum fructibus inde perceptis et qui percipi potuerunt ab occupationis et usurpationis tempore, citius restituere et reddere nobis, aut cui voluerimus loco nostri, nec ulterius retinere, quatenus peccata ingratitudinis, et crimen lesae majestatis cupiatis evitare. Idcirco vos dictum judicem cum instantia, quanta decet, requirimus et monemus, vobisque mandamus expresse quatenus saepe dicta castra cum eorum terminis et pertinentiis, ut praefertur, nobis restituatis, seu restituere faciatis cum fructibus inde perceptis, et qui potuerunt percipi incunctanter, et morosis dilationibus, et frustratoriis exceptionibus, et excusationibus cessantibus quibuscumque. Alioquin, si circa praedicta adimplendo negligens fueritis, vel remissus, procedemus contra vos et bona vestra rigide et potenter ad vindictam eorumdem, sic quod jus nostrum remanebit penitus illibatum, vosque sentietis commissorum poenam, quae insane et improvide peregistis. Sciturus quod de praesentatione, et relatione praesentium Guillelmo de Apiaria cursori curiae nostrae et iurato nuncio, ad hoc per nos specialiter deputato, damus, et dare intendimus plenam fidem. Datum in hoc castro Caralis octava die iunii, anno Domini MCCCLV.