X.

Giacopo II re di Aragona accorda a Ugone III Giudice di Arborea ampia facoltà, e pieni poteri di offrire, promettere, e concedere feudi, franchigie, grazie, compensi e premi alle comunità, e agl’individui, che fossero disposti a riconoscerne il dominio Aragonese in Sardegna, ed a seguire le parti di detto Giudice, e cooperare con lui per la felice riuscita della conquista dell’isola.

(1322, 29 dicembre)

Dal Regio Archivio di Barcellona, Registr. Sardiniae, ab ann. MCCCVIII. ad ann. MCCCXXIII. fol. XI.

Nos Iacobus, Dei gratia, Rex Aragonum, Valentiae, Sardiniae, et Corsicae, Comesque Barchinonae, ac Sanctae Romanae Ecclesiae Vexillarius, Amirantus, et Capitaneus Generalis. Animadvertentes Regio competere culmini, ut eos qui fervore devotionis, ac fidelitatis accensi, suum verum Regium agnoscentes Dominium, se, et sua regalibus dedicant obsequiis, dignae retributionis favoribus, ac muneribus prosequatur. Ea propter hoc Regio uti volentes offitio, de nobilitate conspicua, ac discretione matura vestri incliti viri Ugonis Judicis Arboreae, et Vicecomitis de Basso, plenam fiduciam obtinentes, ac considerantes sinceritatem fidei, et legalitatis, quam ad nos, et Regiam domum nostram studio devotionis habere praetenditis, huius scripti nostri serie, vobis auctoritatem, et plenum posse conferimus: quod possitis communitatibus, sive universitatibus, ac singularibus, et privatis personis, Regni nostri Sardiniae, et Corsicae, Dominium nostrum agnoscere, et vestris vestigiis adhaerere volentibus, nec non aliis in negotio adquisitionis dicti Regni Majestati nostrae serviendi facultatem habentibus, vice, et pro parte nostra offerre, polliceri, atque concedere, beneficia, libertates, gratias, remunerationes, et praemia condigna, prout vestrae prudentiae, aeque, et rationabiliter videbitur faciendum. Nos enim praedictis, quibus dictas remunerationes, et alia, aucthoritate nostra, concesseritis complentibus fideliter ea quae inter vos dictum inclitum Iudicem, et eos conditta fuerint, oblata, et promissa, per vos eis, rata, et firma habebimus, et ea faciemus, inconcusse, et inviolabiliter observari. In cuius rei testimonium praesentem fieri, et Majestatis nostrae sigillo appenditio jussimus communiri. Datum Terrachonae iiij Calendas januarii, anno Domini M.CCC.XXII.

C.^a Franciscus de Bastida, mandato Domini Regis, et fuit ei lecta.